തിരുവനന്തപുരം: സംസ്ഥാനത്ത് കടുത്ത ചൂട് തുടരുമെന്ന മുന്നറിയിപ്പുമായി കേന്ദ്ര കാലാവസ്ഥ വകുപ്പ് നാളെ (ഏപ്രിൽ 24) മൂന്ന് ജില്ലകളിൽ ഉഷ്ണതരംഗ സാധ്യത പ്രഖ്യാപിച്ചു. കൊല്ലം, തൃശൂർ, പാലക്കാട് ജില്ലകളിൽ ഒറ്റപ്പെട്ട സ്ഥലങ്ങളിൽ ഉഷ്ണതരംഗ സാഹചര്യം നിലനിൽക്കാൻ സാധ്യതയുള്ളതിനാൽ ഓറഞ്ച് അലർട്ട് പുറപ്പെടുവിച്ചിട്ടുണ്ട്.
പാലക്കാട് ജില്ലയിൽ താപനില 41°C വരെയും, കൊല്ലം, തൃശൂർ ജില്ലകളിൽ 40°C വരെയും ഉയരാൻ സാധ്യതയുണ്ട്. കോട്ടയം, പത്തനംതിട്ട, എറണാകുളം, കോഴിക്കോട് ജില്ലകളിൽ 38°C വരെ, ആലപ്പുഴ, മലപ്പുറം, കണ്ണൂർ, കാസർഗോഡ് ജില്ലകളിൽ 37°C വരെ, തിരുവനന്തപുരം ജില്ലയിൽ 36°C വരെ താപനില ഉയരുമെന്നാണ് പ്രവചനം. ഇത് സാധാരണയേക്കാൾ 4 മുതൽ 5 ഡിഗ്രി സെൽഷ്യസ് വരെ കൂടുതലായിരിക്കും.
ഉയർന്ന താപനിലയും ഈർപ്പവും ചേർന്ന് സംസ്ഥാനത്ത് ചൂടും അസ്വസ്ഥതയും വർധിക്കുമെന്നും മലയോര മേഖലകൾ ഒഴികെയുള്ള പ്രദേശങ്ങളിൽ കൂടുതൽ ജാഗ്രത ആവശ്യമാണെന്നും അധികൃതർ മുന്നറിയിപ്പ് നൽകി.
ജാഗ്രത നിർദേശങ്ങൾ:
ഉച്ചയ്ക്ക് 11 മുതൽ 3 വരെ നേരിട്ടുള്ള സൂര്യപ്രകാശം ഒഴിവാക്കുക
ധാരാളം വെള്ളം കുടിക്കുക
പ്രായമായവരും കുട്ടികളും പ്രത്യേക ശ്രദ്ധ പുലർത്തുക
പുറത്ത് ജോലി ചെയ്യുന്നവർ സുരക്ഷാ മുൻകരുതലുകൾ സ്വീകരിക്കുക
സംസ്ഥാനത്ത് ഏപ്രിൽ 26 വരെ ചൂട് തുടരുമെന്നാണ് മുന്നറിയിപ്പ്.
