ഇന്ത്യയിലെ പ്രമുഖ പേയ്മെന്റ് ബാങ്കായ പേടിഎം പേയ്മെന്റ് ബാങ്കിന് നൽകിയിരുന്ന ബാങ്കിംഗ് ലൈസൻസ് റിസർവ് ബാങ്ക് ഓഫ് ഇന്ത്യ (ആർബിഐ) റദ്ദാക്കി. നിക്ഷേപകരുടെ താൽപ്പര്യങ്ങൾക്ക് വിരുദ്ധമായ പ്രവർത്തനങ്ങളും, ലൈസൻസ് നിബന്ധനകൾ പാലിക്കാത്തതുമാണ് ഈ തീരുമാനത്തിന് കാരണമായതായി ആർബിഐ വ്യക്തമാക്കി.
ബാങ്കിംഗ് റെഗുലേഷൻ ആക്റ്റ് 1949-ലെ സെക്ഷൻ 22(4) പ്രകാരം 2026 ഏപ്രിൽ 24-ന് പ്രവൃത്തി സമയം അവസാനിക്കുന്നതോടെ ലൈസൻസ് റദ്ദാക്കുന്ന ഉത്തരവ് പ്രാബല്യത്തിൽ വന്നതായി ആർബിഐ പ്രസ്താവനയിൽ അറിയിച്ചു. ഇതോടെ ബാങ്കിന് ഇനി ബാങ്കിംഗ് സേവനങ്ങളോ അനുബന്ധ ബിസിനസ്സുകളോ നടത്താൻ സാധിക്കില്ല.
ബാങ്കിന്റെ പ്രവർത്തനം നിക്ഷേപകർക്കും പൊതുജനങ്ങൾക്കും ഗുണകരമല്ലെന്നും മാനേജ്മെന്റിന്റെ പ്രവർത്തനരീതിയിൽ ഗുരുതരമായ വീഴ്ചകൾ ഉണ്ടെന്നും ആർബിഐ വിലയിരുത്തി. ലൈസൻസ് നിബന്ധനകൾ ലംഘിച്ചതിനാൽ ബാങ്ക് തുടരുന്നതിന് അർത്ഥമില്ലെന്നും ആർബിഐ വ്യക്തമാക്കി.
കൂടാതെ, ബാങ്ക് പിരിച്ചുവിടുന്നതിനായി ഹൈക്കോടതിയിൽ അപേക്ഷ നൽകുമെന്നും ആർബിഐ ബാങ്കിനെ അറിയിച്ചിട്ടുണ്ട്.
2015 ഓഗസ്റ്റിലാണ് ചെറിയ നിക്ഷേപങ്ങൾ സ്വീകരിക്കാൻ അനുവാദമുള്ള ലിമിറ്റഡ് ബാങ്കിംഗ് ലൈസൻസ് പേടിഎം പേയ്മെന്റ് ബാങ്കിന് ലഭിച്ചത്. One97 Communications ആണ് പേടിഎമ്മിന്റെ മാതൃകമ്പനി. മുൻപ് ചൈനയിലെ Ant Group-വും ജപ്പാനിലെ SoftBank-വും കമ്പനിയിലേക്ക് നിക്ഷേപം നടത്തിയിട്ടുണ്ട്.
